البطلة المصرية الحسناء بسنت حميدة في مطار القاهره و معاها ميداليتين ذهب .
.
ليه بتلبس شورت ؟ عشان ده لبس اللعبة دي يا حبيبي , مش هتجري في مسابقات العدو بجلابية و كلسون , هتتكعبل صدقني , و اتحاد اللعبه مش هيوافق عالجلابيه و الكلسون على فكره .
.
بسنت حميدة دخلتنا و دخلت مصر في لعبة مكانش لينا فيها , كنا بنروح البطولات الدولية نقشر بصل أو ناخدها من قصيرها و مانروحش , بقى عندنا بطلة هتحقق لنا بإذن الله ميداليه في أولمبياد باريس 2024 .
.
الكباش و مراكيبهم عارفين و متأكدين إن ده لبس اللعبه وملوش علاقه بالأخلاق ولا الحشمة , لكن هجومهم لغرض تاني , هجومهم تشويه لأي بطل و نجم مصري بيرفع اسم مصر لفوق , لو بسنت لعبت باسم قطر زي اخوها كانو عزفو لها عالربابه بس هي رفضت , و هنا بتبدأ لجان كشك الخليج تلعب دورها , عشان أبطالنا يكرهو عيشتهم و يروحو يتجنسو و يلعبو بإسم دول تانيه , بلاش تقعو في الفخ , هما شوية كباش و امهم عارفه , مش حماة الفضيلة ولا حاجة .
.
ملحوظه كمان لأصدقائنا اللي في الناحية التانيه , بارك و احتفل ببسنت و اعمل لها حفله على صفحتك تليق بإنجازها و تعبها بس كمان ماتنساش زميلاتها و زمايلها من أبطال مصر اللي حققو لنا أكتر من 40 ميدالية في نفس الدورة , بلاش تقعو في الفخ انتو كمان , كلهم ولادنا و بناتنا , سواء كانت محجبه أو مش محجبه , بنت أو ولد , من أبناء النادي الأهلي و الزمالك او من أبناء نادي كفر غنام و كوم الشقافة , كلهم ولاد مصر و فخرها .
